Print this page

Vou ter un irmán premiado no Frei Martín Sarmiento

Rate this item
(0 votes)

Hai unhas semanas coñecíamos que os libros Mortos de ningures (Everest Galicia), escrito por Pereledi (Pere Tobaruela e Ledicia Costas) e ilustrado por Andrés Meixide; e O noso amor será eterno (Xerais) de X. H. Rivadulla Corcón, eran os gañadores dos premios Frei Martín Sarmiento nas categorías de 1º e 2º de ESO e 3º e 4º de ESO e Bacharelato, respectivamente. Agora deuse a coñecer o título do libro gañador da categoría de 1º e 2º de Educación Primaria. Trátase de Vou ter un irmán (Galaxia) de María Solar e ilustrado por Xosé Tomás. O nome da obra gañadora coñeceuse no transcurso dun acto celebrado no colexio La Salle de Santiago de Compostela.

Vou ter un irmán é un libro protagonizado pola incerteza que unha nena sente cando os seus pais lle din que vai ter un irmán.

O premio Frei Martín Sarmiento, organizado pola Comisión de Normalización Lingüística de Escolas Católicas de FERE de Galicia, concédese ás mellores obras de literatura infantil e xuvenil escritas en galego, máis outra categoría para adultos. Este premio ten a singularidade de que os gañadores son elixidos a través do voto dos seus lectores finais, onde participan ao redor de 2.500 nenas e nenos a través do colexio.